యూరప్‌లో చావు భయం .! 25 వేలు దాటిన కరోనా మరణాల సంఖ్య

    ప్రపంచ వ్యాప్తంగా కరోనా వైరస్ కారణంగా ప్రాణాలు వదిలిన వారి సంఖ్య 25 వేలు దాటింది. శుక్రవారం వరకూ ఈ మహమ్మారి బారిన పడి 25,066 మంది చనిపోయారని న్యూస్ ఏజెన్సీ ఏఎఫ్‌పీ తెలిపింది. మృతుల్లో ఎక్కువ మంది యూరోపియన్లేనని వెల్లడించింది. యూరప్‌లో కోవిడ్ బారిన పడి 17,314 మంది ప్రాణాలు కోల్పోయారు. ఇటలీలో 8165 మంది చనిపోగా... స్పెయిన్‌లో 4858 మంది, చైనాలో 3292 మంది ప్రాణాలు వదిలారు.

డిసెంబర్ నుంచి ఇప్పటి వరకూ ప్రపంచవ్యాప్తంగా 5.60 లక్షల మందికిపైగా ఈ వైరస్ బారిన పడ్డారు. కరోనా బాధితుల్లో అమెరికా చైనాను దాటేసిన సంగతి తెలిసిందే. అగ్రరాజ్యంలో 83,338 మందికిపైగా కోవిడ్ బారిన పడగా.. 1321 మంది చనిపోయారు. మరోవైపు లాటిన్ అమెరికాలో కరోనా కేసుల సంఖ్య 11 వేలు దాటిందని ఏఎఫ్‌పీ తెలిపింది.

బ్రిటన్ ప్రధాని బోరిస్ జాన్సన్, ఆరోగ్య శాఖ మంత్రి మ్యాట్ హ్యాంకాక్ కరోనా బారిన పడినట్లు తేలింది. బ్రిటన్‌లో కరోనా పేషెంట్ల సంఖ్య 14,579 దాటగా.. మృతుల సంఖ్య 759గా నమోదైంది. శుక్రవారం ఒక్కరోజే బ్రిటన్లో 189 మంది కరోనా వల్ల ప్రాణాలు కోల్పోయారు.