ప్రపంచవ్యాప్తంగా కరోనా మహమ్మారి మరింత విజృంభిస్తోంది. వైరస్ వెలుగుచూసి తొలి 67 రోజుల్లో బాధితుల సంఖ్య లక్షకు చేరింది. అదే రెండో లక్షను తాకడానికి 11 రోజులు, మూడో లక్షను దాటడానికి కేవలం నాలుగు రోజులే పట్టగా, నాలుగో లక్షను రెండు రోజుల్లోనే చేరుకోవడం మహమ్మారి ఎంత వేగంగా విస్తరిస్తుందనడానికి నిదర్శనం. ఇప్పటి వరకు మహమ్మారి వేలాది మందిని పొట్టనబెట్టుకుంటోంది. ఈ మహమ్మారికి ఎక్కడ అడ్డుకట్ట పడుతుందో, ఎలా అరికట్టాలో తెలియక సతమతవుతున్నాయి. ఇందులో భాగంగా పలు దేశాలు నిషేధాజ్ఞలు విధిస్తున్నాయి. ప్రజలను ఇళ్ల నుంచి రాకుండా ఆంక్షలు జారీచేస్తున్నాయి. అయినా, వైరస్ మరణాలు, బాధితుల సంఖ్య మాత్రం పెరుగుతోంది.
ఇప్పటి వరకు కరోనా వైరస్ వల్ల ప్రపంచవ్యాప్తంగా 18,895 మందికి పైగా ప్రాణాలు కోల్పోగా, బాధితుల సంఖ్య 4.22 లక్షలు దాటింది. గత 24 గంటల్లోనే ప్రపంచవ్యాప్తంగా 2,400 మంది మృతిచెందారంటే భయానక పరిస్థితులకు అద్దం పడుతోంది. వైరస్ బారినపడ్డవారిలో 108,879 మంది కోలుకున్నారు. మరో 2.82 లక్షల మంది పరిస్థితి నిలకడగా, 13,095 మంది పరిస్థితి మాత్రం ఆందోళనకరంగా ఉంది. మొత్తం 127,774 కేసులు క్లోజ్ అయ్యాయి.
ఇటలీలో మంగళవారం మరో 743 మంది ప్రాణాలు కోల్పోగా.. మరణాల సంఖ్య 6,820కు చేరుకుంది. కొత్తగా మరో 5,249 పాజిటివ్ కేసులు నమోదు కాగా, మొత్తం కేసులు 69,176 దాటింది. కోవిడ్ విషయంలో ఇటలీ ప్రభుత్వం తొలుత నిర్లక్ష్యం చేయడంతోనే ఇంతటి విపత్తుకు దారితీసిందనే విమర్శలు వెల్లువెత్తుతున్నాయి. ఉత్తర ఇటలీలోని లంబార్డే ప్రాంతంలోనే అత్యధికంగా కోవిడ్ మరణాలు చోటుచేసుకుంటున్నాయి. ఈ ప్రాంతంలో పటిష్టమైన చర్యలు తీసుకోకపోవడంతో వైరస్ వ్యాప్తి తీవ్రంగా ఉందని ప్రస్తుతం చైనా వైద్య నిపుణులు వ్యాఖ్యానిస్తున్నారు.
వైరస్ తొలుత వెలుగుచూసి చైనాలో మంగళవారం నలుగురు చనిపోగా, 47 కొత్త కేసులు నమోదయ్యాయి. దీంతో ఆ దేశంలో మరణాల సంఖ్య 3,281కు చేరింది. స్పెయిన్లో 2,991, ఇరాన్లో 1,934, ఫ్రాన్స్లో 1,100 మంది, అమెరికాలో 778 మంది మృతిచెందారు. అమెరికాలో బాధితుల సంఖ్య 54,823వేలకు చేరుకోగా, శుక్రవారం 11,089 కేసులు నమోదయ్యాయి. దక్షిణ కొరియాలో వైరస్ తీవ్రత కాస్త తగ్గుముఖం పట్టింది. ఆ దేశం తీసుకున్న చర్యల సత్ఫలితాలను ఇస్తున్నాయి. ఇప్పటి వరకు అక్కడ 120 మంది ప్రాణాలు కోల్పోయారు. కొత్త కేసులు శుక్రవారం 76 బయటపడగా.. మొత్తం 9,037 మంది వైరస్ బారినపడ్డారు.
Comments
Post a Comment